Web edukia bistaratu

Mugikortasun plana

Mugikortasun-plana

Garapen jasangarria da hazkunde ekonomikoa, kohesio soziala eta ingurumenarekiko errespetua uztartzea, era honetan gizartearen ongizatea eta bizi kalitatea bermatzeko eta aldi berean egungo eta etorkizuneko baliabide naturalen jarraipena bermatzeko.

320x162

Testuinguru horretan, hiri-garraioak eragin negatiboa du aipatutako oreka horretan,  ingurumenean zein herritarren osasun eta segurtasunean.

Hori dela eta, Urola Kostako Udal Elkarteak mugikortasun baldintzak eta irisgarritasuna hobetzeko egitasmoa jarri du abian, betiere iraunkortasunaren ikuspegitik. Egitasmo hau, gainera, eskualdeko herritar eta enpresek mugikortasun jasangarriaren inguruan adierazitako kezka eta eskaeretatik abiatu da.

 

Zumaiako poligonoak: mugikortasun plana

Herritar asko bertaratzen da gure eskualdeko poligonoetara lanera, egunero-egunero, eta nagusi den mugikortasun eredua (norbere autoa) ez da jasangarria. Alabaina, zaila da besterik gabe autoa alde batera uztea, beste alternatibarik ez dagoenean.

Hori dela eta, mugikortasun jasangarrirako plana garatuko du Udal Elkarteak.

Lehen urratsa esperientzia pilotu bat da, Zumaian hasi duguna. Proiektu honen bitartez, Zumaiako Joxe Mari Korta, Xey eta Guascor poligonoen arteko  mugikortasun jasangarrirako plan bat landuko dugu. Ondoren, esperientzia pilotu honetan ikasitakoa oinarritzat hartuta, asmoa da mugikortasun-plana eskualdeko gainontzeko industria-guneetara zabaltzea.

Gure proiektua

Udal Elkartearen eta Zumaiako Udalaren ekimena da abian jarri duguna. Helburua da Zumaiako Joxe Mari Korta, Xey eta Guascor Poligonoen arteko mugikortasun jasangarrirako plan bat garatzea.

Bistakoa denez, gisa horretako mugikortasun plan bat garatzeko ezinbestekoa da enpresek eta bertako langile eta eragileek parte hartzea. Hori dela eta, eragile publikoen, pribatuen eta norbanakoen lankidetzan oinarritutako foroa antolatu dugu Zumaian, mugikortasun plana partaidetzan oinarrituta lantzeko. 2016ko azaroaz geroztik hainbat lan-saio egin ditu foro horrek.

Era berean, azterketa sakona ari gara egiten, poligono horietako mugikortasuna aztertzeko. Alde batetik, enpresei galdetegi bat egin diegu, mugikortasunarekin zerikusia duten zerbitzu eta alderdiak aztertzeko: lan-ordutegiak, lan txandak, jangela zerbitzua, garraio zerbitzua... Bestetik, poligono horietako langileentzat galdetegi bat prestatu dugu (eskura duzu behean), joan-etorriak noiz eta nola egiten dituzten aztertu ahal izateko (garraio-ohiturak).

Azterketa horren helburua da gaurko egoeratik abiatuta irtenbideak proposatzea, mugikortasun jasangarriaren ikuspegitik. Hori guztia bideratzen ari gara Biziker Mugikortasun Aholkularitza enpresaren laguntzarekin.

Enpresaren ezaugarriak mugikortasunaren ikuspegitik.
 

Ekintza-plana

Mugikortasun baldintzak eta irisgarritasuna hobetzeko helburuarekin, 2017ko otsailetik irailera Zumaian kokatutako Joxe Mari Korta, Guascor eta Xey poligonoetako industrialdeen azterketa egin dugu.

Azterketa honetan aipatutako 3 industrialdeak hartu dira kontuan: guztira 36 enpresa eta 823 langile. Horietatik, 23 enpresek modu aktiboan parte hartu dute ikerketan, hau da, enpresa guztien %65 (parte hartu duten enpresetan 652 langile ari dira lanean, industrialde horietako langile guztien %79).

Azterketa horretatik abiatuta, Joxe Mari Korta, Guascor eta Xey poligonoetako Mugikortasun Jasangarrirako ekintza-planaren proposamena landu dugu, hau da, poligono horietako mugikortasuna eta joan-etorriak arrazionalizatzeko neurri sorta bat proposatu dugu, desplazamendu hauek seguruagoak, eraginkorragoak eta jasangarriagoak izan daitezen. Eskura duzu ekintza-planaren proposamena behean.

Galdetegia, lehentasunak zehazteko

320x162

Ekintza-planean hainbat neurri proposatzen dira. Hurrengo urratsa da poligono horietako enpresek neurri horien artean lehenesten dituztenak zehaztea. Horretarako, galdetegi labur bat prestatu dugu, lehentasuna duten neurri edo ekintzak finkatzeko. Parte hartu eta bete galdetegia!

Ekintza-planaren helburuak

Joxe Mari Korta, Guascor eta Xey poligonoetako Mugikortasun Jasangarrirako plan honekin lau helburu nagusi hauek lortu nahi ditugu:

1. PARTAIDETZA: gobernantza eredu berriak inplementatzea. Lan egiteko modu berrien inplementazioa, beste eremuetara eraman daitezkeenak.

2.  INGURUMENA: mugikortasun ez jasangarriak eragindako inpaktuak murriztea.

3.  SOZIALA: enpresetako langileen eta lan bila dabiltzan pertsonen ongizatea bermatzea.

4.  EKONOMIKOA: Enpresen eta eskualdeko industrialdeetako lehiakortasuna sustatzea.

Ikerketaren emaitzak eta ekintza-plana.
 

Argibideak eta izen-ematea

Parte hartu nahi baduzu, jarri gurekin harremanetan.

Urola Kostako Udal Elkartea

Enpresentzako Zerbitzuak

Web edukia bistaratu

Langileek betetzeko galdetegia