Urola Kostako Udal Elkarteak (UKUE), Gipuzkoako Foru Aldundiaren laguntzarekin, adimen artifizialaren (AA) aplikazio praktikoak lantzeko TALENTUR programako bi tailer antolatu ditu, eskualdeko turismo-sektoreko eragileei zuzenduta. Prestakuntza programa honen helburua da enpresei tresna eraginkorrak eskaintzea beren eguneroko kudeaketa errazteko, denbora aurrezteko eta lehiakortasuna handitzeko.

Ikastaroak UKUEren egoitzan egingo dira, eta honako hauek izango dira eskainiko diren saioak:

• Maiatzak 13: “Agentzia Inteligentea: marketinean aditu birtual bat sortu”
  Tailer honetan parte-hartzaileek marketin-estrategiak eta eduki digitalak kudeatzeko laguntzaile adimentsu bat sortzen ikasiko dute. Besteak beste, testuen sorkuntza automatikoa, irudi eta bideoen optimizazioa eta sare sozialetarako edukien plangintza landuko dira. Amaieran, parte-hartzaileek beren negoziorako egokitutako sistema bat eskuratuko dute.
   
• Maiatzak 20: “AA agentea: produktibitatea handitu Google Workspace-n”
  Saio honetan, posta elektronikoa eta kalkulu-orriak bezalako tresnak automatizatzeko teknikak erakutsiko dira. Parte-hartzaileek AA erabiliz formulak sortzen, datuak automatikoki erauzten eta bezeroen iritziak aztertzen ikasiko dute. Tailerraren amaieran, fakturazio-sistema automatizatu bat eta iritziak kudeatzeko tresna bat izango dituzte.

Prestakuntza hauek ikuspegi praktikoa dute: parte-hartzaileek ez dute soilik teoria jasoko, baizik eta zuzenean aplikatzeko moduko tresnak garatuko dituzte. Helburua da enpresek beren denbora optimizatzea eta bezeroei arreta hobea eskaintzea.

Urola Kostako Udal Elkarteak eskualdeko enpresak animatzen ditu ekimen honetan parte hartzera, digitalizazioan pauso bat aurrera emateko eta etorkizuneko erronkei aurre egiteko.

• Izen-ematea: https://labur.eus/talenturizena

• Argibideak: Urola Kostako Udal Elkartea, 943890808, turismoa@urolakosta.eus​​​​​​​